Denne luten fekk Halvor Håvardsonen ved delingi 1842. Husi står på ein sate sud for nordre F. Der står ein stor kvitmåla hovudbygning, bra uthus og eit gamalt bur, noko uvant i utsjånad med ein dørstokk sterkt merkt etter hakk av bile mot kjøtknokar. Det er berre 13 mål dyrka jord, men 3 000 mål skoggrunn.

Denne garden har gått i mange handlar, og der har vore endå fleire brukarar. Etter Halvor Håvardson vart ein vegingeniør Krag eigar på den tid vegen langs Nisservatn vart bygt, ‏(projektera 26.6.1846)‏. Han var byggmeistar på den vegen. Krag selde garden til «Kompaniet frå Morgedal» Sveinung Steffason m. fl. Så kjøpte Jørgen Eikeland det og 5.3.1895 får Olav Tallevson Veum skjøte av Jørgen. -- Olav gav skjøte 2.12.1904 til versonen Ketil Jonson Kiland, og 10.9.1935 får dotter hans, Gro Hildeborg g.m. Olav Hansson Nordbø ‏(Øy)‏ skjøte på eigedomen.

Av brukarar kan nemnast Knut Nerison, Morgedal, Halvor Groven ‏(Tufte)‏ og Signe ‏(seinare på Sælid)‏, Aslak Slokvik og Torbjørg, Olav Nordskog og Liv, og frå 1905 til 1948 Jon Høljeson Horgeviki, Nissedal og Anne Tarjeisdotter Bruenden ‏(Vrådal)‏. No bur desse hjå son sin Harald Findreng g.m. Bergit Pekeberg på Myrland ‏(bureisingsbruk 20 mål)‏ komen frå søndre Findreng.