Dette er synste garden i Vrådal utmot Nissedal. Garden ligg eit godt stykke frå vegen ovan ein stor dalglup med tettvaksen skog. Ein skogsveg er arbeidt fram til garden i nyare tid. Fyrr var det ein gard, no er det tvo bruk, nordre og søndre Findreng. Den gamle husestaden var på nordre parten, på ein flå rygg med det vesle Flatfjell som vargard mot nordvest.

Namnet kan koma av ei flåt nordan husi som visstnok har eingong stade med lang snerpefinn, finn fl. finnar, kan ha vorte til Findreng. Elles er det segn om at ein hjuringgut ‏(dreng)‏ fann ein tussegard her midt i villskogen. Med han gjætte, sette han seg på ei låg ‏(eldg. vindfelle)‏ og spikka på staven sin. Etterpå stakk han kniven inn i lågi og sovna. Då han vakna stod kniven i dørstokken på eit stort hus ‑ med fjøs og løde og stabbur på tunet. Og ut kom ein gamal mann og kjærde seg for at guten hadde teke garden av han. Guten svara han var ikkje meint på å taka nokon gard ‑ men tussen meinte at det var ingi anna råd enn å flytja, og garden fekk drengen få -- «men», sa tussen «det var lukka det berre råka på husmannsplassen min og ikkje sjølve hovudbølet.» ‑ Gardsnamnet har vore skrive på fleire måtar ‑ men alltid med d midt i ordet. Findrenngh 1593, Finnddrengh 1612, Findreng 1665.

Til garden har høyrt Steane, Vesle-Findreng, Lauvstad ‏(Urimeleg)‏, Myrland, ‏(Pylseviki)‏ og Reinskos og staulen Vassend. Det høyrde sag og kvern til garden og godt fiske i Nisser. Det var ei vid mark då alt var samla -- minst 15 000 mål.

Frå gamalt vart garden rekna øydegard med skyld 1 tn. 1 ½ dalar. Buskapen 1657: 7 kyr, 18 sauer, 4 geiter. Garden høyrde då til Kviteseid prestebol ‏(1 tn.)‏

Eigarar og brukarar. Eirik ‏(Erick)‏ svarar arbeidskatt i 1593-94 og likeins saltverkskatt 1609-28. I 1629-31 brukar presten «hr. Jens» eigedomen, og 1635-42 «hr. Peder». «Orm med hustru, søn og datter» svarar koppskatt 1645.

Ved manntalet ‏(1661)‏ og folketelj. 1664 er Tov ‏(Toff)‏ oppsittar med sønene Olav 26 år, Olav 10 år. Christopher skattar av 1 tn. 1672‑86. Kjetil, Torgeir og Torvild er brukarar framover til 1721. I 1751 er det framleis under Kviteseid prestebol 1 2/3 tn., og Johannes er oppsitjar.

Eit skifte på Findreng 8.3.1707 etter Gunvor Leivsdotter Brt. 116 rd. Net. 107 rd. Mannen er Tarjei Christensen. Dei har 3 gutar ‏(myndige)‏, og 1 gjente g.m. Torvild. Bjørgulvson,

Ditto 13.5.1763 etter Johannes Olavson g.m. Sidsel Pedersdotter -- dei har 7 born ‏(26 år -- 11 år)‏. Brt. 87 rd. Gjeld 96 rd.

Ditto 30.4.1794. Svein Gunnarson g.m. Kari Halvorsdotter oppgjev buet. ‏(Born: Gunnar, Olav 13 år, Torbjørg 34 år.)‏ Brt. 83 rd. Gjeld 452 rd.

I åri 1808‑21 er det Gunnar Sveinson som er brukar på Findreng. No er elles skyldi auka til 2 tn., men Gunnar har ingen heimel til garden. Sonen Håvard Gunnarson overlet garden til sonen sin Halvor. Den 12.9.1842 vert Findreng deila i 2 luter millom Aslak Knutson Grotnes og Halvor Håvardsonen -- såleis at Aslak får hovudbølet nordre F. 13 ½ sett. ‏(3 daler, 2 ort)‏ og Halvor 10 ½ sett. ‏(2 daler, 3 ort, 5 skill.)‏ Gamle Håvard får feste på Vesle-Findreng 1.12.1842. Dette var ein god plass med stor fødsle. Det var sag og kvern og smie og badstoge til plassen. Sigurd Wrå hadde jamvel vore tenestgut der i ungdomen.

Den siste som var husmann der, gjekk det ut med og han flutte til Funnemark -- ein no attlagd plass i Nissedal.