Namnet noko uklårt. O. Rygh nemner opphav som tytebær og tyta f. ‏(Kjertel i stein)‏; men det kan koma av tyta. ‏(Ein veik, jamn låt t. d. frå elvi)‏. jfr.: engtyte.

I eit prenta diplom frå 23. 1. 1558 er Tytegrav ‏(Tiudegraff)‏ nemnt. Ein Orm Sundreson sel sin odel i garden til Olfuer ‏(Auver)‏ Halvorson. Dei ytte som offergåve til retten 4 lodd sylv, ein stålboge og ei halv punds gryte. I eit ditto frå 20. 2. 1564 vitnar Eilev Tjostolvson at Sundre Salveson gav dotter si Margit 2 markabol jord i Tytegrav i heimanfylgje, «så sant hjelpe mig Gud som jeg sant siger, Gud være mig gram og vred om jeg lyver» o.s.v.

Tytegrav var rekna øydegard i 1609, med ein Tarald som brukar, men i 1647 har garden teke form og er no halvgard med skyld 2 2/3 tn. og 3 daler «en ganske ringe gaard efter skylden.»

Elles skifter nemningi frå leiglendingsgard, ‏(1620-23)‏ øydegard ‏(1644)‏ til halvgard ‏(1647)‏.
Anders «enkemand med pige», svarar koppskatt i 1645. Buskapen i 1657 er 1 hest, 5 kyr, 9 sauer, 1 geit og 0 gris.
I 1661-62 heiter brukaren Tov, og ved folketelj. 1664 Gunhild med sonen Såmund. 20 år.

Det er fleire storbønder som eig luter i Tytegrav framover, såleis Asbjørn Bjåland 1 tn. ‏(1611-21)‏, Såmund Lundevall 2 tn. ‏(1622-23)‏, Knut Gotuholt 2 tn. ‏(1625-35)‏, Torkjel Donstad 2 ½ tn. ‏(1649-54)‏, Gutorm Sandland 2 tn. ‏(1641-43)‏ og Aslak Kvålsodd 2 tn. ‏(1676-81)‏.

I denne tid heiter brukarane: Anders ‏(1647-53)‏, Håvard ‏(1654-61)‏. Enka Gunhild ‏(1664-68)‏, Torgim ‏(1672)‏, Aslak ‏(1675)‏. Den same kanskje som Aslak Meås som svarar odelskatt av Tytegrav 1682-88. Knut er brukar 1676-78, Mogens 1683-92, Auver 1695-99, Anders 1700 ‏(2 2/3 tn.)‏, Tov 1702, heile garden, Torbjørn 1703 og framover til 1729 -- då er det skifte på Tytegrav etter Torbjørn Eirikson ‏(Sinnes)‏ g.m. Kari Aslaksdotter Kvålsodd. ‏(6 born)‏. Brt. 251 rd. Net. 53 rd. Irekna Tytegrav 2 tn. m.b. 200 rd. -- så det er ikkje så mykje dei eig i garden.

Eirik som er 25 år, overtek garden frå 1730 til 1762 og løyser inn luter altfort så han i 1747-62 eig 2 tn. Kona hans heiter Kjersti Stiansdotter ‏(d. 1791 -- 80 år)‏. Kjetil son deira får heimel 18. 2. 1765 på 2 tn. Han er g.m. Lovei Torvildsdotter Kleiv. Han døyr på Tytegrav 1806, 71 år. Kjetil og Lovei har 5 born som vaks opp. Den eldste guten Eirik ‏(1765-1832)‏ g.m. Kari Gunleiksdtr, To ‏(Seljord)‏ sit med garden til 1803. -- Det er skifte etter kona hans 9. 11. 1805. Brt. 851 rd. Net. 49 rd. Irekna Tytegrav 11 sett. m.b. over 1 tn. 3 sett. for 800 rd. Broren Torbjørn Kjetilson ‏(1777-1832)‏ g.m. Ingebjørg Leidulvsdotter Kleiv prøver så med garden nokre år -- men denne ætti går ut.

I 1808 er Sondre brukar og sonen hans Auver og Olav Rui, men 28. 2. 1811 får Olav Guttormson heimel på 1 tn. i Tytegrav. -- Han var på Tytegrav til i 1820 åri -- flutte så til Kleivrud. Skyldeling 1826 tingl 7. 7. 1827 av Tytegrav.
I 1833 går Bjønndalan frå Tytegrav for då gifter dotteri Gunhild Kjetilsdotter seg med Olav Asbjørnson Fleinsborg og får denne plassen i arv. ‏(Sjå Seljord II s. 281)‏.

Sveinung Jonson ‏(Sandland 19)‏ og Turid Johannesdotter Skare har Tytegrav nokre år. Dei reiser til U.S.A. 1842 med 5 born. Ho laut selja den fine heimkomekista måla av Nikuls Buine før ho reiste for å få pengar. 20 år etter kom O. Bergland og Gunleik Loupedalen til setlementet i Trempealeau Valley -- der Turid budde. Dei hadde kome seint om kvelden og ferdalasset stod ute. Då dei kom ut om morgonen, stod det ei gamal kone ved lasset og gret. Ho hadde kjent att kista si. Ho laut då få kjøpe kiste att. ‏(Sjå Rosmåling i T. 95)‏.

Same året ‏(1842)‏ kjem eit ektepar frå Valle til Tytegrav. Det er Gjermund Kjetilson «Haistov» og Åste Sveinungsdotter ‏(3 born)‏. -- Året etter kjem Sveinung Gunleikson ‏(kanskje verfaren)‏ og Ingebjørg Tallevsdotter «for at bruge gaarden Tydegraf».

Gjermund og kona flyt til H.mo 1859 -- dotteri Ingebjørg ‏(f. i Valle 1837)‏ flyt til Lårdal 1856.
Em. Gjermund Sveinungson ‏(Brottlid 3)‏ g.m. Bergit Tarjeisdotter Kleiv 1859 -- bur no på Tytegrav framover til 1890 åri. Bergit d. på Tytegrav 1893 og Gjermund g. III m. Ragnhild Soterud, Bø og flyt frå Tytegrav på sine gamle dagar.

Knut Hansson Lid frå Seljord er eigar av garden i 1905 -- og den ætti har garden framleis. -- Dotteri Tone g.m. Eivind Mo, Rauland har butt her på Tytegrav i mange år. ‏(1930-46)‏. No har dei bruksfolk der. ‏(William Andersen, Nesodden)‏.

NB. Skjøte frå Gjermund S. Tytegrav til Knut Lie 17. 8. 1903. ‏(Kr. 8000)‏. I 1933, 4. 1. sereigevtale at Tone Mo ‏(f. Lie)‏ skal ha Tytegrav.

Tytegrav har oml. 40 mål dyrka jord, 5 mål skrapslått, 8000 mål skog og 1200 mål fjellvidde.
Stogebygningen er gamal, men vølt og innåtbygt i 1932. Loftet er frå ikr. 1800, løa 1850, fjøset 1920.

Plassar under Tytegrav

Beitlid
Ligg høgt oppe mot skarvi, Mannen der heitte Jon og kona Ingebjørg. Ein av ungane heitte Aslak. Dei var fælt fatige i Beitlid, og Aslak gjekk med tøya av mor si i skulen. Det var endå av dei gamle trøyene med krossaum i ryggen.
Kari syster åt Ingebjørg, budde og i Beitlid. Ho var så flink jakkeskreddar. Ho laga dei kvite jakkene for karane og dei grøne trøyene for kvendi og ho lita alt sjølv.

På Beitlid brende dei au litt brennevin så i skugg og skjol. For ei potte fekk dei 18 skilling og opptil 1 mark. Folki på Beitlid til U.S.A. i 1874 med Egil og Aslak ‏(19 år og 16 år)‏ «vil slektningers hjælp». Sidan har det ikkje butt folk der.

Grytingkosi
Ligg nedom Omtveitvegen ned mot elvi. Rettugheiti for plassenvar 2 teiger dått. Egil Grytingkosi budde her sist.

Bjønndalan
Gunhild Kjetilsdotter Tytegrav g.m. Olav Asbjørnson Fleinsborg, fekk Bjønndalan i ervelut frå Tytegrav. Dei budde her stundom, men det var så fælt. med tussar der. Karen Øydegarden og Gunhild Gottenborg vart så forfylgde der ein kveld at dei måtte krabbe oppå bjelkane. -- Eingong kika ein liten tussegut inn i glaset til dei, og dei såg han hoppa ned or moldbenken og tok ut.
Stoga som står att er ein av dei eldste i grendi.

Åmdalane
Høgt opp mot skarvi er ein gamal staule til Tytegrav -- no attlagd.